Šudiņ, 28. februarī, Rēzeknē, Latgolys viestnīceibā GORS, svineigā ceremonejā, kluotasūt Latvejis Republikys Kulturys ministrei Dacei Melbārdei, tyka paziņuoti Latgalīšu kulturys goda bolvys „Boņuks 2015“ sajiemieji – eipašuokuos nūtikšonys, aktivitatis i ļauds latgalīšu kulturā 2015. godā.
Literaturys kategorejā bolvu par lobuokū snāgumu literaturā sajieme Anita Mileika (par dzejis kruojumu „mūžīgā nepārtikusī stirna“), bet par 2015. goda lobuokū izdavumu/gruomotu atzeits pasauļa literaturys kasikys tulkuojums latgaliski – Luisa Kerola „Alise Breinumu zemē“.
2015. gods beja ražeigs latgalīšu muzykā, jo eipaši daudz i kvalitativu izdavumu saryupāts tautys muzykys laikā. Kai goda debitanti bolvu sajieme grupa „Tautumeitas“, kas ar dzīsmis „Aņņeite“ video verseju laurus plyuce ari kategorejā „Lobuokais muzykys video“. Trešū godu Boņuka bolva teik padūta nominacejā „Lobuokais snāgums akademiskajā muzykā“, kurā ituo goda uzvarātuojs ir Andrejs Selickis ar Latvejis Radejis kora jubileja koncertā kai reizi Rēzeknē pyrmatskaņuotū dzīsmi „Šyupeļdzīsme Jēzum“. Bolvu par lobuokū 2015. goda snāgumu šlagermuzykā sajieme Aņss Ataols Bierzeņš par albumu „Pasaver“, bet etnoroka grupys „Laimas Muzykanti“ snāgums tyka atzeits kai lobuokais tautys muzykā. Bolvu nominacejā „Lobuokais snāgums alternativajā muzykā“ par sovu debeja albumu „Ašņa dasys“ sajieme poetiskuo roka apvīneiba „Kapļi“, bet par lobuokajim latgalīšu pop/rock muzykā ari itūgod atzeita grupa „Dabasu Durovys“. Latgalīšu kulturys goda bolvā nominacejā „Radejis hits“ teik nūskaidruota ari Latvejis radejis stacejuos spālātuokuo latgalīšu dzīsme (spālāta vysmoz 3 radio stacejuos) i piec LaIPA datu 2015. godā vyvaira radeju stacejuos skaniejuse taišni grupys „Dabasu Durovys“ dzīsme „Pādys“.
Vysa plašuokuo bolvys sadaļa jau tradicionali ir par sabīdryskū aktivitati i sasnāgumim aba „Sabīdreiba i kultura“. Pi goda amatnīka/saiminīka gūda tyka Artis Logins, kurs jau daudzu godu garumā popularizej latgalīšu literaturys i muzykys izdavumus, ir latgalikuokuo Daugovpiļs veikala „O! Marta“ i latgalīšu škārsteikla veikala taiseitslatgola.lv saiminīks. Kai goda snāgums vizualajā muokslā tyka atzeita tielnīka Gleba Pantelejeva dorbu izstuode „Latgales rapsodija“, bet kai goda snāgums skotivis muokslā gūdynuots festivalā „ORGANismi“ topušais uzvadums „Saule. Bērni. Rainis“. Nominacejā „Goda snāgums audiovizualajā muzykā“ bolvu sajieme bīdeibys „Bruoli un Muosys“ projekts „Latgalīšu volūdys apvuiceibu video“, bet bolvys par latgalīšu volūdys populariziešonu atzineiba tyka Kuorsovys nūvoda dūmei ar projekta „saREDZI latgalīšu volūdu“ 2. daļu, kura turpynuots nūvodā izvītuot latgaliskys īlu nūruodis. Pārn īdybynuotuos nominacejis „Par latgalīšu kulturys populariziešonu Latvejā i pasaulī“ laurus plyuce apguoda „Mansards“ izdavums „Ludzas igauņu pasakas“, kuruos dasaskar ari eipašai Latgolys kulturviesturis daļai – igauņu apdzeivuotūs teritoreju montuojumam. Pārnais gods latgalīšu kulturā ness vēļ vīnu jaunu vītu, kurymā nūtikt ari latgaliskim pasuokumim – atjaunuotū Lūznovys muižu, kurai sajieme bolvu nominacejā „Goda nūtikšona“. Jau ziņuots, ka itūgod par myuža īguļdejumu latgalīšu kulturys atteisteibā Boņuku sajieme pravests, kulturviesturnīks i sabīdryskais darbinīks Alberts Budže, bet kai 2015. goda cylvāks kulturā sumynuota pasaulī atzeituo i Latgolā tik meiluo varganiste Iveta Apkalna.
Ceremoneju beja vareiba pīdzeivuot na tik kluotīnē, Latgolys viestnīceibā GORS, bet ari tīšraidē, kū nūdrūsynuoja lītuotne LMT Straume, kurymā kotrs grybātuojs varēs nūsavērt ari ceremonejis video īrokstu. http://straume.lmt.lv/lv/kultura/kultura/bonuks/1844
Latgolys viestnīceiba GORS, Latgalīšu kulturys goda bolvys „Boņuks 2015“ organizātuoji, aicynoj kotru interesentu jau niu sekuot leidza latgalīšu kulturys nūtikšonom 2016. godā, lai dasacitu bolvai i gūdynuotu deveitajā Latgalīšu kulturys goda bolvys „Boņuks 2016“ ceremonejā 2017. goda 26. februarī.
Latgalīšu kulturys goda bolvys „Boņuks“ mierks ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejuo goda grīzumā. „Boņuks 2015“ nūtikšonu atbaļsteja Vaļsts kulturkapitala fonds, Rēzeknis piļsātys dūme, Rēzeknis nūvoda dūme, Daugovpiļs nūvoda dūme, Dagdys, Leivuona, Ludzys, Bolvu, Baļtinovys, Ciblys, Kuorsovys, Preiļu, Viļakys i Ruguoju nūvoda pošvaļdeibys, Nacionalais Kino centrys, bīdreiba „Latvijas Izpildītāju un prodeucentu apvienība“ un Latvejis Mobilais telefons.
